American Beauty

I had always heard your entire life flashes in front of your eyes the second before you die. First of all, that one second isn't a second at all, it stretches on forever, like an ocean of time...

أسمع زمان

كل واحد من المغنيين زمان كان ليه شكل معين وطريقة معينة فى الغناء تخليك ترتبط بيه وبطريقته، دا غير إن الأصوات كانت مختلفة عن بعضها تماماً، ممكن شخص يشوف الموضوع على أساس إنك قديم وعايش من خمسين سنة فاتوا!!
لكن الفكرة مش كدة..لو الحاجة قديمة بس حلوة وأحسن من حاجات جديدية كتيرة أيه المانع إنى أستخدمها وأستغلها أو أسمعها
عبدالوهاب وزياد الرحبانى ووديع الصافى مثلاً هما المعنى الحقيقى للصوت العميق
 وفيروز أكيد المعنى الحقيقى للصوت الملائكى اللى يعليك لسابع سما،أم كلثوم هى أساس السلطنة مع كباية الشاى بالنعناع ساعة العصر،عبدالحليم بقى الشجن والحزن كله متجمع فى صوته..ولكل واحد وقت تسمعه فيه وحالة تسمعه فيها،والفرق اللى مابينهم بس هواللى مدى لكل واحد فيهم حالته ووقته وشكله وحلوته...ومش قصدى أقارنهم بمغنيين دلوقت لأن لكل وقت أذان ولكل واحد رأيه فى الناس اللى بيسمعها...لكن فكرة أنك تتريق عليهم أو على اللى بيسمعهم هى دى الفكرة بس
والغنا أصلاً حرام !! :D

ماما هى أمى !!

من الأول كدة أسمع أغنية مصر هى أمى !! 

"مصر مش أمى لأ "..مالك مستغرب ليه ؟! 

ماما هى أمى ونيل مصر بيجرى فى مصر إنما دمى فى كرات حمرا وبيضا وأياً كان اللى فيه دا شئ مايخصكش لأنه دمى أنا و ما أرضاش إنى أشوفو مرمى ع الأسفلت لمجرد إن سيادتك بتمسح الشارع بيه !!

..شمسها بقى هى هى الشمس اللى بتطلع فى كولالمبور  وبروكينا فاسو..ما هو أصل كوكب الأرض مالوش غير شمس واحدة شوفت أزاى ..وبعدين انا أسمر ربانى منغير أى شمس ..

وبالنسبة بقى  لشكلها فأنا لا يحدنى من الشمال البحرالمتوسط ولا من الغرب ليبيا ولا مـ الشرق البحر الأحمر ولامن الجنوب السودان ..أنا بنى آدم طبيعى جداً ولو قولتلى إن  لونى قمحى فأنا لسه قايل إنى أسمر ثم إن مصر بطلت تزرع قمح من أكتر من 30 سنة !!

وعلى فكرة عشة جنب نيلها هتجبلك بلهارسيا ونموس وحشرات وبلا أزرق ..فى حين إن ألف قصر دول ثروة كبيرة جداً مانحلمش بيها أصلاً !!

يوم الجمعة تانى !!

برغم الظروف السياسية و الأجتماعية اللى دايرة فـ البلد...يبقى يوم الجمعة ثابت على موقفه دون ثورة تغير فيه أى شئ ...فيوم الجمعة بيتميز عن غيره من أيام ربنا بصلاة الجمعة...شفت المعلومة دى !! 

لأ بجد صلاة الجمعة لها طقوس غريبة عند المصريين عموماً..فعادتاً ترى الأمهات بتبخر البيت على أساس إن محدش هيحسدهم غير يوم الجمعة...وبتلاقى الرجالة بيستحموا عشان ينزلوا يصلوا الجمعة ( دول للناس اللى بتستحمى يعنى) .... وتلاقيهم بيعبوا نفسهم فى الجلابية البيضة ويمسكوا السبحة وييدأوا فى تجسيد شخصية الشيخ الشعراوى 0(رحمه الله) ..ثم يذهبوا إلى صلاة الجمعة (طبعاً!!) ييقعدوا ع الأرض يستنو خطيب المرتدى طقم الكوكاكولا الشهير (ملابس الأزهريين) ثم يبدأ الخطيب بالمقدمة المحفوظة من كثرة التكرار (إن الحمد لله نحمده ونستعينه ونستهديه ونستغفره ونعوذ بالله من شرور أنفسنا وسيئات اعمالنا..إلخ) غير يا أخى !!

ثم يبدأ بممارسة هوايته المفضلة بالهتاف فى مكبر الصوت لكى يصدع المصلين لا لينصحهم ..ثم أيه يعنى الشئ الطارئ اللى يستاهل الزعيق دا كله؟.. طب مهم بقالهم 1435 سنة بيهروا فى نفس المواضيع العبقرية زى الصدق والأمانة والزكاة (انا مش فاهم بيكلمنا على الزكاة ليه ما طالما جايين نصلى يعنى مش لقيين ناكل!!) دا غير الجنة ...وطبعاً النار اللى هى جهنم وسقر والسعير واللى هى مصيرنا عشان جاين نصلى !!..حضرتك مش واخد بالك أنا هنا فى المسجد أنا اللى جى أصلى كلمنى عن الجنة عشان لو مادخلتهاش أهو أبقى كسبت أنى تخيلتها!!..ودا طبعاً غير مواضيع المناسبات زى مثلاً ليلة الأسراء والمعراج وعاشوراء ورمضان والعيد الصغير والعيد الكبير..ومولد النبى أيوة مولد النبى وعن المعجزة الألاهية والصدفة اللوزعية التى جعلت الرسول(صلى الله عليه وسلم) يتولد فى مولد النبى !!..وعن العدل اللى بالنسبة لخطيب الجمعة متجسد فى وزير الدفاع الحالى و الرئيس السابق والأسبق رغم أحتلافهم الشديد فى التفكير على حد علمى ..سياسة دى سيبك منها..

اللى عايز أقوله إن فى وسائل حديثة تجعل المصلين لايشعرون بالملل من صلاة الجمعة..

ما العيب او الحرام فى توفير مكان مريح ليجلسوا المصلين فيه بدلاً من الأرض؟

ما العيب أو الحرام فى أستخدام وسائل حديثة (غير الميكروفون) كالشاشات والكمبيوتر لتوصيل المعلومة المراد إيصالها بأفضل وسيلة ممكنة ؟

ما العيب أو الحرام فى أن تناقش الخطبة مشاكل الحى او الشارع و أن تحاول حلها ؟

ما العيب أو الحرام فى تنظيم طريقة وضع الأحذية وتأمنها للحد من سرقتها فى أكثر الأماكن أماناً على وجه الأرض المسجد؟

ما العيب أو الحرام فى توسيع بوابات المساجد لكى لا يحدث أزدحام فى نهاية كل صلاة عند الأبواب؟

وأكيد هناك غير ذلك من أفكار تجعل المسلمين تنتظر صلاة الجمعة بفارغ الصبر بدلاً من الهروب منها..معلش بقى طولت عاليكم يلا بقى سلام عليكم. 

المصريون مخلوقات فضائية !!..

فى مجرة من المجرات التى تبعد عننا بملايين السنين الضوئية...كان فى كوكب عليه حياه..الكوكب دا كان فى ناس مختلفة جداً جداً جداً عننا !!..يعنى مثلاً هتلاقى عندهم مرصد فضائى بيرصده فيه حركات النجوم والكواكب وبيحاولوا يبحثوا عن أى كوكب تانى عليه حياه !!

أحنا بنعمل كدة برده !!

..بجد..

طيب..

دا غباء هو أحنا أكتشفنا اللى فى الأرض لما عايزين نكتشف اللى فـ الفضاء ..الظاهر إن الكوكب دا مش مختلف كتير ولا حاجة !! ماعلينا..المهم أحد علماء هذا الكوكب وجد كوكب بعيـــــــد جداً لونه أزرق ويحتمل وجود حياة على سطحه ..بسبب وجود ماء...دا على أساس إن الفضائيين بيشربوا ماية زينا عادى..المهم و أكتشفو إن الكوكب دا عليه حياة فعلاً وليه غلاف جوى وفيه جاذبية والكلام الكتير دا...وهما جايين الأرض عدو ع القمر لقوا فاضى فقالوا يبنوا مسلة وهرمين أقتداءً بأجدادانا الفراعنة " أصلهم لما بصوا من كوكبهم شافوا الهرم فكيفهم اوى !! "...ودا على فكرة السبب طبعاً لما رواد الفضاء طلعوا القمر لقوا هرم

(حيات أمك) !!

هرم أيه اللى لقوا فوق يلا !!...أيه يا واد !!

على فكرة أنا ممكن أقولك إن نفس رواد الفضاء وجدوا زبل فار أرمل على المريخ اللى ما رحوهش أصلاً وأنت أحتمال تصدقنى بس لما أقولك الفار دا مصرى !!...فراعنة أيه اللى طلعوا القمر!! دول شالوا من غانا 6/1 ...أو فى أحتمال بيقول إن الفراعنة أصلاً مش من الكوكب..أيوة يا أبنى أنت مش شايف الأشكال اللى بتصطبح بيها كل يوم...فضائيييييين !! الظاهر إننا مش أحفاد الفراعنة دا أحنا أحفاد E.T

ليه بس كدة ؟!

كنت قاعد مع نفسى شوية قلت أكتب !!..مش مهم أكتب أيه ومش مهم إن عندى إمتحان ولازم أذاكر ولا مهم حتى أسلوبى فـ الكتابة جامد والا لأ ..المهم إنى أكتب مادام أتعلمت أقرا وأكتب فى المدارس..حبيت أكلم نفسى أو بمعنى أصح حبيت أكتب لنفسى...الحقيقة أنا كل ما بقعد مع نفسى شوية بيخطر فى بالى سؤال ؟!..أشمعنى انا ؟! يمكن مشكلتى مش عويصة أوى..ويمكن تقول عليا نايتى ومدّلع..بس مش هى دى الفكرة ..الفكرة فعلاً هو أشمعنى أنا ؟!..يعنى على رأى "أحمد حلمى " (أنا ليه ماطلعتش هيثم وليه ما أسميش لؤى ؟ ) ليه مش الواد الفونط اللى البنات أول ما تشوفه تتهبل وتريل !! "أسف فى التعبير بس أنتوا بتريلوا فعلاً !!" ليه مش الواد ألأبيضانى الوسيم اللى دمه خفيف الجامد كيك كيك كيك...ليه مش الواد اللى واكل البت وأمها ومقطع السمكة وديلها ! ليه معنديش عربية أخر موديل و بلبس أحسن لبس  و باكل كل يوم من Mac. وباخذ coffee  بتاعتى كل يوم من starbucks ...ليه ؟!...وطبعاً لازم أقولك ماتقولش أشمعنى أنا قول ليه مش أنا ؟ ..وخد الموضوع بتفاؤل وبإشراق وبأمل وخلص الموضوع فى ثوانى ... خش صليلك ركعتين وكل حاجة هتبقى كويسة ...حيات أبوك ما نقصاك وناقصة الكام كلمة اللى انت حافظهم وجى تقولهملى الكلام بتاع التنمية البشريى يتطبق فى أرض المعجزات مش هنا ؟! ..ثم إن أكتر واحد متفائل فى البلد دى مات محروق.. الله يرحمه.. خلاصة الكلام والرغى الكتير دا أنى عايز أقول كل زول بالزوج بتاعه إلا انا ماعندى مره !!...يمكن أنت أول رد فعل فى دماغك تقول مين دا وعايز أيه ؟ فى ناس بتموت فى مظاهرات و فى رصاص وشرطة وإلخ.. وانت جى تكلمنى فى starbucks ..الظاهر فعلاً إن الواحد تافه ؟!

الفعل !!

 محمد أنور السادات هو رئيس مصر من 1970 حتى 1981 .... أشهر ما قام به فى فترة حكمه كانت حرب 1973 و أعادة فتح قناة السويس وزيارته لأسرائيل وعملية السلام ...ولكن يشوب عصره بعض الأعتقالات وعدم الديموقراطية فى الحكم ... ويشوبه أيضاً حكم الفرد والدكتاتورية .... ما أريد قوله أن نفس الشخص قام بأشياء أيجابية و مفيدة للمجتمع وهو نفسه قام بأشياء سلبية وظالمة للفرد والمجتمع ... فإذا قررت أن تحبه فلماذا سوف تحبه رغم ظلمه للناس وإذا قررت أن تكره فلما وهو من أنتصر فى حرب أكتوبر... فأنت لن تستطيع أن تحبه ولا أن تكره ...لذا فـتقبل الشخص أياً كان ... وأكره الفعل السلبى و حب الفعل الأيجابى ... لا أقصد السادات بشخصه ولكنى أقصده كمثال فهو فعل ما فعل من إيجابيات و سلبيات كأى شخص فى مكانه ...فلا تلم أحداً عساك ألا تلام ولكن أختلف وأكره الفعل وليس الشخص .

دائرة الدم - بلال فضل - بوابة الشروق

دائرة الدم - بلال فضل - بوابة الشروق

مرحباً بالموت !!

ما الذى يجعل الموت شيئاً قبيحاً فأنت لن تجوع فيه ولن تعطش ولن تتألم ولن تنعس ولن تنتشى ولن تفرح ولن تتألم ولن تتوجع ولن تسهر ولن تنم ولن تموت ولن تحب ولن تشتاق ولن تسمع ولن ترى ولن تتكلم ولن تتعصب ولن تمرض ولن تُشفى ولن تلعب و تمل ولن تخسر ولن تفوز ولن تتكبر ولن تذل ولن تغضب ولن تتذوق ولن تثار ولن تضار ولن تحاصر ولن تتشاجر ولن تٌجرح ولن ...إلخ ولن يحدث لك فيه أى شئ إلى قيام الساعة !! إننا فقط نعرف ما الذى لن يحدث لنا أثناء الموت ولكن لا نعرف ما سوف يحدث لنا فيه فهو مجهول ولهذا نهابه ولكن ماذا لو كان الموت ممتع لو كان ممتع فمرحباً بالموت .

يا ليل يا عين - تانيا صالح

وصية ..والد!!

فى المرة المقبلة التى أراك فيها أتمنى أن أراك سعيداً وفرحاً ..أعلم أنى الأمل الوحيد والسبب لكى تستمر الحياة بالنسبة لك ..ولكن أستمر ولا تستسلم وحاول أن تبتسم دائماً ...حاول أن تقهر الخوف من الناس ...حاول ألا تعيش وحيداً لقد أرقنى هذا اليوم ..هذا اليوم الذى سوف تقرأ فيه هذه الصفحة ...ليس لأنى ذاهب إلى حيث لا أدرى وحسب بل لأنك أيضاً ستذهب إلى حيث لا تدرى ...ولكن هذه هى الحياة ..الحياة يا بنى لن تترك لك فرصة لتعرفها ..وتذكّر دائماً أدعى فإن الله قريب .

ومن يوم قرات هذه الكلمات أنتظرت أن تأتى المرة المقبلة ..لكن من الواضح أنها ستتأخر 

إن الله على كل شئ قدير

لماذا ..؟

قد تتهمنى بأنى لا أعلم شئ وإننى مجرد (مفتى ) أفتى واقول كلام يدعو إلى الكفر والألحاد ... ولكن إذا لم نفكر سنموت سنهلك سنضيع ....إذا أصررنا على إغلاق عقولنا على ما هو ممنهج لنا ونسمع الكلام وفقط ... حتى فى القرآن الكريم والسنة النبوية المشرفة يجب أيضاً ان نتعقل الكلام ونفرض صحة وخطأ الكلام مهما جلّ فـإذا لم تصل إلى الله بعقلك فكل الطرق التى سلكتها إلى الله خاطئة!!...إن المنهج المكتوب المفروض لنا هو أن الشيطان هو عدو الله وأن هناك حرب فى الأخرة سيهزم فيها الله - سبحانه وتعالى- إبليس بصعوبة !!...إنها لسذاجة أن تظن أن الشيطان يستطيع أن يعادى الله - سبحانه وتعالى- فهو الذى خلق الشيطان وخلق الخير الشربالأضافة إلى انه لا يوجد أى دليل من القرلآن والسنة على ذلك !! ... الله خلق كل شئ !! ولكن السؤال هنا لماذا خلق الله كل شئ !!...خلقنا لنعبده ولكن لماذا نعبد الله - سبحانه وتعالى -!! لماذا نصلى ونصوم ونزكى ونحج !! لأن الله - عز وجلّ- قد طلب منا ذلك !! ولكن أيطلب الله جلّ فى سماه وعظمة اسماؤه منا نحن أن نعبده ... أو بمعنى اخر..ماذا يفعل الله – سبحانه وتعالى – بعبادتنا له ؟...لكل ذلك الكلام أجابة وهو أن لماذا مخلوقة وهل مخلوقة وكل شئ مخلوق فكيف تسأل والسؤال مخلوق !! 

أنتخبوا ميكافللى....شعباً لمصر !!

وأصبح عندنا 90 مليون ميكافللى !! 90 مليون سياسى محنك وفاهم ودارس وعارف فى كل شئ ..90 مليون حاكم لمصر وعارف ما يدخل إلى خزينة الدولة وما يخرج منها !!..أصبح لدينا ثلاث رئات لكى نتنفس بسرعة كى نكمل جدالنا مع الشخص الأخر ظناً مننا أن فوزنا فى ذلك الجدال التافه هو فوز فكرتنا ومعتقدنا فى الحياة العامة !! ....كنا نلهو بالكرة عقولنا كانت عبارة عن كرة قدم منفوخة ..كل أحاديثنا كانت أنت زملكاوى والا أهلاوى .. ولكنها الأن أصبحت مليئة بالميادين والشعارات والقضايا السياسية بكل أنوعاها !! وأصبح السؤال الأن أنت تتبع أى تيار سياسى ؟؟ ... وكأن عقولنا لا تملأ إلا بالتفاهات من الأشياء ... أفلام , كرة ,أغنى وسياسة أيضاً!! هؤلاء قالوا الدين وهؤلاء قاوا الدنيا وأختلفوا مع بعض على ذلك !! كيف يختلف الدين والدنيا ؟؟ انهما واحد يكمل بعضهما البعض . عبدالله عزت

أنا فهلوى إذاً أنا موجود !!

أبو العُريف 

كتير مننا بيشوف فهلوة المصرى دى حاجة سلبية وخطأ رغم أنه ممكن تُستغل بشكل مناسب وإيجابى جداً كتير من الصناعات ممكن تتوقف على الذكاء البديهى (الفهلوة) .... كلمة "أتصرف "عند المصريين تُعتبر حل !!...دا حتى فىّ مقولة شهيرة جداً فـمصر وهى "الجيش قالك أيه ؟....أتصرف " المصرى ممكن يعملك من أزازة الماء دش ومن علب الزبادى مكروفون !! ...كل شئ قدام المصرى هو آلة موسيقية !! ...دا غير إن أى مصرى أياً كان عمله فهو كهربائى وسباك وحداد ومهندس كومبيوتر !! وطبعاً دكتور ..فهو متخصص فى تشخيص حالته وحالة غيره إعطائها الدواء المناسب من وجهة نظره و الغير مناسب بالمرة من وجهة نظر الطب ورغم ذلك يتعافى من أى مرض ...فهلوة المصرى هى عبارة عن جوهرة مكنونة ...المصرى يعرف كل لغات العالم كدة sense !! وطبعاً بيعرف لغة الأشارة ولغة الجسد!! فى مثل مشهور جداً فى مصر برده وهو "أقف عدل وأتكلم عوج " ودا يدل على فهم للغة الجسد بطريقة رهيبة !! انا مش قصدى السخرية ولا الأستهزاء انا قصدى ليه رغم هذا الذكاء الفطرى عند المصرى فى الصناعات عموماً مصر من دول العالم الثالث ؟ دى الفهلوة دى مش عند اليابانين!! ...والا ياترى كل دول العالم الثالث فهلوية والفهلوة هى اللى وصلتنا لكدة !!

ولى الأمر !!

                                            

أستمراراً لسلسلة التعليم كان يجب علينا الحديث عن أولياء الأمور لأنهم طرفاً أساسياً فى القضية ... بإختصار دورهم يتمثل فى التمويل .. هم الممولين للدروس والمدارس وغيرها من وسائل التعليم ..أُزيح من على كاهلهم مصروفات المدارس الغالية حين أصبح التعليم مجانياً .. ولكن التعليم أصبح أغلى سعراً بسبب الدروس ...ولى الأمر ينتظر من أبنه التفوق وينتظر من المدرس أن يراعى ضميره فى الدروس الخصوصية !! ... وينتظر أيضاً من الوزارة أن تأتى بأمتحان برداً وسلاماً على الطلاب ... وينتظر من الكنترول تصحيح ورقة أبنه بعدل وإنصاف وبعض من الرأفة !! ...ولى الأمر يثق فى جميع الأطراف لأنه ليس له أى خيار أخر !!  وللأسف بعد كل ذلك من النادر ان يحصل على ما يريد .... ولأختصار الثلاث مقالات فى جملة واحدة ... مطلوب للتعليم  ثورة وليس وزير !! 

ثـق بنفــســــــــك

ثـق بنفــســــــــك فأنــت مــن روح الله

وفــى الله يتق كــل شئ فى الحيـــــــاة

ابتســـــم خــلى جــواك جــــميــــــــل

صدق وآمن إن مفيش مستحيــــــــــــل

أنت الضمير الثائر أنت السبيـــــــــل

لأول خطـوة فى الطريق الطويــــــــل

أنت الجـــواد الفائز مــاليك مثيــــــــل

عدى الحدود وأرعُد بصوت الصــهيل

ثـق بنفــســـــــــك فأنــت من روح الله

وفــى الله يتق كــل شئ فى الحيــــــاة

أنت المــمـــر الوحيد لـلنجــــــــــــاح

أنت الهدف والسبب  فى الكـــــــــفاح

أنسى الهموم والمشـــــــاكل والجراح

أنسى الزعل والحــزن واللـــــى راح

و إرســم بــأيدك أنت أجــــمل صباح

أنده بصــــــوتك أنت بأجمل صيـــاح

ثـق بنفــســــــــك فأنــت من روح الله

وفــى الله يتق كــل شئ فى الحيــــــاة

أنت جىّ تتعلم ؟؟ ..متأكد !!

                                أنت جىّ تتعلم ؟؟ ..متأكد !!  

           . بيتهيألى فى ناس كتير جداً ناقشت التعليم ... ناقشت ايه اللى بيحصل ف المدارس من أخطاء تعليمية وتربوية... وكأن التربية والتعليم هو اسم تابع لذاته و لا يدل  على المدارس المصرية ... لكن أنا هناقش الموضوع من كذا زاوية (الطالب - المدرس -  ولى الأمر)....خلينا نبدأ المرة دى بالطالب المرفوع تعليمياً بالضمة لأنه فى مبتدأ حياته...يجب عليه الذهاب إلى الدروس اللى بتضيع نص وقته دا غير المدرسة اللى لو مرحاش بيترفد ... أو بيهددوه بكدة!! .... دا غير انه عايز يشبع غريزة الجوع و العطش ونداءات الطبيعة بس دا لو ما بلغش !! .... ويمتع نفسه بكام ساعة قدام الكمبيوتر والتلفزيون لأنه لازم يستريح لأن الراحة فحد ذاتها انجاز... وبعد كل دا مُطالب انه يذاكر ويجيب مجموع !!...هتقولى فى ناس بتعمل كدة وبتجيب مجاميع عالية جداً هقولك .... وبيعمل ايه بالمجموع !!..بيتخرج بيروح كلية تطلع ايمانه وبعديها بيروح يشتغل ف حاجة مش تخصصه! الشغل مش عيب ... بس انك تفضل تذاكر اكتر من 18 سنة من عمرك ومتطلعش أى حاجة هو دا اللى عيب !! وفـ الأخر تقبض مرتب عايز مرتب!! ...ومُطالب انك تتجوز وتعمل عيلة بيه !! يا أخى ....    

إجابة سؤالك

لو مش فـ إيديك إجابة سؤالك .. طب فين يكون الحلّ

طب فين الأمل والآمــــــــال .. والا عــــقلك مــــــلّ

والا القـلـب أفتقر م الفرح   ..  وع  الهم  دايمــاً دلّ

دا مهما الحزن زاد بالصبر .. دايماً يختــــــــــــــــلّ

للصبر عظــمة وقـــــــــار .. وللهم يامـــــــــــــا ذلّ

دا الصبر يابنى فايـــــز    ..   مهما الأمــر جــــــلّ

المعادلة صحيحة ...!

                                     المعادلة صحيحة ...!

         .بكمل فكرتى فـ التعليم المصرى ..المرة اللى فاتت حاولت انى اتكلم عن الطالب بأختصار ... المرة دى هتكلم عن المدرس !! ...كتير من الناس شايفين المدرسين مستغلين وظلمة ومفتريين ...بيعتمدوا فى فكرتهم فى نهب  الفلوس فى الدروس وانا معاك دا صحيح ...حصة واحدة لمدرس تقدر تشترى شقة !! .... بس المدرس بيصحى الصبح الساعة 7 يروح المدرسة ...وبعديها يروح المركز اللى بيدى فى الدروس أو يتنطط فى البيوت وف الأخر بيرجع البيت مهدود حيله على الساعة 11 أو 12 !! المدرس بيتعب !! ونتيجة للتعب دا بياخد عليه أجر .... أجر يتناسب مع ظروف المعيشة اللى أحنا عايشنها ويتناسب مع قدر المدرس المفترض انه يكون موجود فـ المجتمع .... المعادلة صحيحة فهو يجتهد ولذالك يؤجر .... بينما هناك الكثير من الأعمال التى تتطلب مجهود كبير جداً ورغم ذلك أجرها لا يتناسب معها وهنا المعادلة غير صحيحة ... وكتير من الناس فاكرين إن الحكومة تملك سلطة إلغاء الدروس الخصوصية من البلد ...لكن للأسف الموضوع مش فإيد الحكومة !! إذا قفلت المراكز التعليمية فهى مش هتقدر تمنع الطلاب والمدرسين التجمع فى أى بيت ...الدروس مش هتتلغى إلا بإرادة شعبية طلابية .. نصحا فـ يوم كدة نلاقى الطلاب ما بتروحش دروس !! وسعتها لازم الحكومة تراضى المدرسين بمرتبات عدلة عشان ما يعملوش إضراب !!